繼續同史友們介紹世界各地嘅最新考古發現，「冰箱」同「焗爐」呢啲設施喺我哋嘅認知當中都係現代嘅廚房用具，但史友們又有冇諗過其實喺古代都可能會有類似嘅設計呢？阿史今次就同大家講一講啦！
近日考古團隊就喺伊拉克古城拉格什（Lagash）進行挖掘，結果唔單止搵到一座可以追溯到公元前2700年前嘅酒館，隨住考古發掘工作持續，考古團隊仲喺當中搵到長凳、烤箱及冰箱等等，就連專家都直言呢次發現打破咗唔少認知！
喺呢次考古發掘當中，被發現嘅老酒館分為室內同埋露天庭院兩部分，室內嘅部分保存得相當完整，喺當中唔單止搵到有5000年歷史嘅長凳，甚至仲有工業尺寸、以磚塊組成嘅烤箱。至於5000年前嘅「冰箱」就唔係真係可以製冷，而係可以令到食物保持乾燥，延長保鮮期。
咁點解喺呢個美索不達米亞南部最古老城市會有呢項發現呢？考古團隊就推測呢個場所應該係昔日嘅中產人士聚腳地，閒時古代人都會喺度飲下酒、食下燒魚咁，真係悠閒！
原圖嚟自網絡